Ĉu forgesita teksto?

Tre interese estas foliumi malnovajn revuojn, nu almenaŭ mi opinias, ke tia distraĵo estas interesa. Hodiaŭ krozante la skanitan kolekton de revuoj dela Esperanto-muzeo en Vieno mi trovis kanto-tekston en Pola Esperantisto (1931) verkita de Asta Mikkelsen el Kopenhago. Tiun ĉi oni kantas laŭ la melodio de Henrik Rung.




Melodio: I Danmark er jeg født, der har jeg hjemme


La novan senton, kiun Majstro kreis,
La senton, kiu devas regi nin,
la fratan senton, kiun ni obeis,
la senton, kiu ĉiam gvidis lin;
grandega bela sent', la Majstron al honor,
La senton, kiu estas lia gloro,
adora ni, adoras ni,
senton benitan vi.


La forta voĉo, kiu al ni sonis,
la ĉarma voĉo de modesta vir'
muziksimila en oreloj tonis
kaj vokis al fervora pionir',
Fidela, bona voĉ' neniam silentiĝos,
en niaj koroj ĝi eterne vivos.
Ĉarmega voĉ, ĉarmega voĉ,
ni ja adoras vin.


Kaj ĝojon al la koroj ĝi instigis,
kuraĝe sekvis ĝin fervora ar'
por Zamenhofa lingvo kunfratiĝis
jam en la starto Esperantistar'
Ho, vi tutmonda lingv', ho bela Esperanto,
vin laŭdas ni parole kaj en kanto.
Ni laŭdas vin, ni laŭdas vin,
lingvon de la fratar'.

Jen la ligilo de la melodio.

Koregan dankon al tiuj, kiuj emas skani malnovajn revuojn ktp.

 Ĉu vi antaŭe konis la tekston?

La Roboj

La Roboj 

Mia robo ruĝas kiel rozo,

Ĉiuj miaj aĵoj ruĝas kiel ĝi;

Tio ja ĉar mi amas ĉion ruĝan,

Kaj ĉar poŝtiston* tiom amas mi. 

Mia robo verdas kiel herbo,

Ĉiuj miaj aĵoj verdas kiel ĝi,

Tio ja ĉar mi amas ĉion verdan

kaj ĉar ĝardeniston tiom amas mi.

Mia robo bluas kiel maro,

Ĉiuj miaj aĵoj bluas kiel ĝi

Tio ja ĉar mi amas ĉion bluan

kaj ĉar mariston tiom amas mi.

Mia robo flavas  kiel oro,

Ĉiuj miaj aĵoj oras kiel ĝi,

Tio ja ĉar mi amas ĉion oran

kaj ĉar oriston tiom amas mi.

Mia robo nigras kiel karbo,

Ĉiuj miaj aĵoj nigras kiel ĝi,

Tio ja ĉar mi amas ĉion nigran

kaj ĉar fulgiston tiom amas mi.

Mia robo buntas kiel mondo,

Ĉiuj miaj aĵoj buntas kiel ĝi,

Tio ja ĉar mi amas ĉion buntan

kaj ĉar pentriston tiom amas mi.

Teksto dana kaj melodio: Gunnar Nyborg-Jensen (1912 - 1970)

Traduko: Christian Graversen. El la Terglobo kantas 1956.

(Unu el la plej famaj infankantoj danaj kaj norvegaj. Gunnar Nyborg-Jensen estis kantpedagogo kaj verkisto. Lia infankantlibro 'De små synger' - ' La etuloj kantas' estis inkludata en la dana literara kanono de la jaro 2006)

Poŝtiston*

Poŝtisto en Danio tradicie vestas sin per ruĝa mantelo.

Unu el la plej internaciaj kantoj en la mondo.

Laŭ la priskribo de la video: 'Tiu ĉi estas malnova dana kanto'. Nu, verdire la kanto estas originale franca, sed troviĝas tradukaĵoj multlingvaj.

En Britio infanoj kantas: 'Are you sleeping, are you sleeping, Brother John'. Kiam ili komencis lerni la francan, tiam oni ofte instruas al ili la kanton 'Frère Jaques'. En danaj infanĝardeno oni kantas: 'Mester Jacob'. Cetere mi iam havis koleginon el Gronlando, kiu kantigis nin per la gronlanda versio, tiun mi bedaŭrinde jam forgesas.

 Lastjare dum la dana, germana kaj pola kongreso en Berlino Kim Henriksen postulis al la ĉeestantaro multnacia, ke oni kantu la saman kanton denasklingve. 

Do oni kantis ĝin germane, dane, pole, hispane, itale ktp.

 Kiam Kim demandis, ĉu ne angle? Mi jesis kaj tiam iu, kiu sidis malantaŭ mi ekkriis:

'' Ve, ne en  la angla!''

''Ho, jes ankaŭ en la angla'' estis mia repliko.

KAJ

mi kantis la kanton angle.

Frato Ĵako

Frato Ĵako, frato Ĵako, 

levu vin, levu vin

/Jen la sonorilo/

/bim bam bum/

Frato Ĵako, frato Ĵako,

lavu vin, lavu vin,

/metu viajn vestojn/

/bim bam bum/

Frato Ĵako, frato Ĵako,

kuru do, kuru do,

/tuj al la lernejo/

/bim bam bum

moli Malon'

             Moli Malon'

Teksto : Eira popolkanto

Muziko : Eira popolmelodio

Traduko: Poul Thorsen

(Nu, la kanto ne estas dana, sed Poul Thorsen, la tradukanto, estis ja dano)

 

Sur strato Dublina

kun beleco knabina

unue okulis min Moli Malon'.

Kun puŝveturilo

tra l' strat-maltrankvilo

kriis: Konkoj kaj skombroj,

/: vivantaj, o-ho! :/

Ŝi fiŝojn disvendis,

kaj ŝi tute ne fremdis,

ĉar same la patro kaj ŝia patrin'

kun puŝveturilo

tra l' stratmaltrankvilo

kriis: Konkoj kaj skombroj,

/: vivantaj, o-ho! :/

Ŝi mortis pro febro,

tute ne eblis retro-

venigi la vivon de Moli Malon'.

Sed ŝia spirito

post ŝia vehiklo

krias: Konkoj kaj skombroj,

/: vivantaj, o-ho! :/

Oni ĝojas, kiam la suno brilas

Oni ĝojas, kiam la suno brilas

( Supre la sunveturilo kiu videblas en Nacia Muzeo en Kopenhago.)

('Man bli'r så glad, når solen skinner')

Teksto : C.V.Meincke

Muziko : Kai Normann Andersen

Traduko: Kaj Røssum

Koro saltas en la brust',

bona tag' laŭ mia gust',

ina kiso logas de lipopar'.

Movas sin pied' sen lim',

malpeziĝas la anim',

cerbo ja klariĝas, kaj mi scias ja:

Mi ĝojas, se la suno brilas

foriĝas ĝem', sopir' de l' tag'.

Pro ĝi la turoj or-similas,

la urbon premas mi en brak'.

Klarigu tion vi!

Rondire ridas mi,

nun ĝojas en liber' -

mi scias pri l' afer':

Mi ĝojas, se la suno brilas

sur reĝa urbo KOPENHAG'.

Se verdiĝas et-foli'

de mi sonas ĝoja kri',

KOPENHAG' ja estas plej bona lok'.

Se printempas en april'

kun la alaŭdeta tril',

tiam mi kunkantas pro ĉarma allog'.

Mi ĝojas, se la suno brilas,

foriĝas ĝem', sopir' de l' tag'.

Bontrov' ĉi tie ja facilas

en hejma urbo KOPENHAG'.

Ja optimismas mi

vagante tie ĉi,

ĝojiĝas per la kant'

ja ĉiu vizitant'.

Mi ĝojas, se la suno brilas

sur reĝa urbo KOPENHAG'.

Eble eĉ se vi estus malgaja, la suno gajigus vin! Nu, laŭ la virino en la sekva video.

Konsolo de la danoj.

        Konsolo de la danoj

                             'Langt højere bjerge'

                             Teksto : N.F.S.Grundtvig 1820

                             Muziko : H.O.C. Zinck      1801

                             Traduko: C. Graversen

Nu, ĝis nun neniu jam enmetis videon de tiu ĉi en YouTube. 

Tamen  

Jen la melodio

La montoj de l' mondo en granda mezur'

la danajn altaĵojn superas.

Ni tamen pro nia ebena natur'

kun verdaj montetoj fieras.

Ne taŭgas por ni la kapturna altec'.

Ĉetera restad' donas pli da progres'.

Pejzaĝoj mirinde pli bele laŭ dir'

troviĝas en lokoj aliaj.

Sed kreskas ĉe ni miozot' kaj latir'

sur bordoj kun fagoj graciaj,

kaj pleje nin ravas, dum vivo sur ter',

floranta kamparo kun ondo-border'.

Kaj eble aliaj por gloro kaj mon'

pli pompajn faraĵojn prezentis.

Sed en nia ŝildo leonoj, sur fon'

de koroj, ne vane atentis.

Kverelu la agloj pri parto post part'

de l' tero, ni restas ĉe nia standard'.

Popoloj multege pli saĝaj ol ni

kredeble kelk-ie sin trovas.

Sed danoj sin helpas per simpla raci',

konkuri kun di' ni ne provas.

Se brulas por justo kaj vero la kor',

al nia prudento ne mankas valor'.

Kaj lingvoj pli noblaj, superbaj sen lim'

laŭdire kelkloke sonoras.

Sed danoj, en lingvo de deca esprim',

la alton kaj belon honoras.

Kaj pli ni moligas per milda frazer',

ol pistas aliaj per frazoj el fer'.

Hubula kanto

               Hubula kanto

('Med min hakke, min skovl og min spade')

Teksto : Johan Skjoldborg (1861 - 1936)

Muziko : Johan Torrild

Traduko: H.E.Jensen

Dum fine silentas la vintra ĥoral',

kaj streĉas sin en la sunbrilo

folioj de vintro-taŭzita sekal',

altiras min kvazaŭ por festo-batal'

la hakil', ŝovelil' kaj fosilo.

La eĝon rustintan ĝis ŝtalblua pur'

poluras mi per akrigilo,

kaj nun mi forkuras de vando kaj mur'

al ŝtonplena kamp' en la marĉa natur'

kun hakil', ŝovelil' kaj fosilo.

Aŭskultas kantadon mi de la birdar',

min vokas alaŭdo per trilo;

kunvenas ja tiel ni jaron post jar',

ĝi trilas, laboras mi en la kampar'

per hakil', ŝovelil' kaj fosilo.

Kaj kiam la suno subiras en bel'

en vast-erikeja trankvilo,

la dorson rektigas mi, vokas min cel',

briladas kaj glimas la ŝtalblua hel'

de hakil', ŝovelil' kaj fosilo.

      

Iom da informoj pri la tradukanto H.E. Jensen:    Jen la fonto.

<<  La tradukanto =HEJ - Hans Erik Jensen, Toustrup, - † 18.6.1973
Jam antaŭ proksimume 40 jaroj HEJ esperantiĝis, kaj dum tre multaj jaroj li estis ege aktiva diversmaniere. Li ne nur tradukis multajn danajn kantojn, sed li ankaŭ verkis multajn originajn.
Unu el la plej gravaj labor­oj, en kiu li partoprenis, estis la redaktado de Da­na Antologio, kiu realigis dank' al tio, ke HEJ estis la plej aktiva kaj laborema aganto.>>